اليوم الأول (إبعاد المشتتات وتجهيز خطة أول 10 أيام)
انهارده الأربعاء 11 ديسمبر 2024 و دا اليوم الأول من تحدى ال100 يوم و للى ميعرفنيش أنا أحمد طالب فى تالتة ثانوى وبعمل التحدى دا مع نفسى عشان يكون دافع ليا للتغيير للأحسن وبنزل كل يوم يومياتى هنا وكمان على موقع اكس تقدرو تتابعونى لو حابين تشاركوا معايا الرحلة
 |
| اليوم الأول من التحدى |
قرار
اليوم بدأ و أنا بحاول أخد قرار بقالى تقريبا يومين و هو انى عايز امسح برامج المديا من على تليفونى لفترة مؤقتة عشان الوقت الكتير اللى بيضيع عليهم و الحمد لله قدرت اخد القرار ده ومسحت تقريبا كل برامج التواصل ما عادا اكس لأن هو اللى بستخدمة فى توثيق الرحلة إلى جانب المدونة
تفاصيل اليوم
صحيت تقريبا الساعة خمسة ونص الصبح و مقدرتش أصلى الفجر جماعة للأسف وبعدها أخدت سيشن مذاكرة لمدة ساعة تقريبا كانت بداية المحاضرة التمهيدية بتاعت مستر محمد عبد المعبود وبعد كدا فطرت وضيعت شوية وقت لحد معاد درس الأنجليزى الساعة تسعة ونص وبعدها نزلت الدرس و روحت من الدرس تقريبا الساعة 12 ونص بعدها صليت الظهر و اتغديت و معملتش اى حاجة مفيدة تقريبا لحد صلاة العصر بعد صلاة العصر بدأت أحط خطة فعلية للمهمام اللى هعملها خلال العشر أيام الجايين و من المفترض انى اخلص خلالهم أول فصل فيزياء لأنى كنت مذاكرة قبل كدا أصلا ف دا هيكون بمثابة مراجعة مش أكتر وكمان من المفترض انى أبدا ف الانجليزى كمان و أراجع بردو جزء من اللى أنا كنت مذاكرة بعد م حطيت الخطة دى كان فاضل تقريبا ساعة على المغرب ف بدأت فعلياأذاكر فيزياء كملت المحاضرة التمهيدية وبعدها بدات فى أول محاضرة من المنهج من البلاى ليست بتاعت مستر عبد المعبود سمعت جزء منها وصليت المغرب وبعدها حليت شوية على اللى أنا ذاكرتة وصليت العشاء و فاضل جزء من المحاضرة هبدأ بيه يومى بكرا إن شاء الله وبس .... انتهى اليوم على كدا
ختام
ممكن يكون التحصيل بسيط على مدار اليوم و فى وقت كتير بيضيع بس أنا راضى كبداية ومع الوقت هحاول أقلل الوقت اللى بيضيع ده و استغلة فى حاجات تانية مفيدة وفى النهاية أتمنى ان القصة دى ويومياتى اللى أنا بكتبها دى تكون مصدر لإلهام ناس فى يوم من الأيام
أسأل الله لى ولكم الثبات و الإستمرارية فى التطور وشكرا ليكم على القراءة وبتمنى ليكم حياة سعيدة
و السلام عليكم ورحمة الله وبركاتة
التسميات
تطوير_الذات