مقدمة
تحدى ال100 يوم دا تحدى أنا هعمله مع نفسى عشان اتغير للأحسن ودا عن طريق انى هحاول لتخلص من عادات وحشة انا بعملها وفى نفس الوقت هحاول ابنى عادات جديدة مفيدة و كمان اتعلم حاجات جديدة أطور بيها من نفسى زى انى مثلا ممكن احاول اتعلم لغة تانية أو انى اتعلم برمجة مثلا
 |
| تحدى ال100 يوم |
الفترة المحددة للتحدى
التحدى هيكون عبارة عن 100 يوم متواصلين بداية من 11 ديسمبر 2024 و حتى بداية فصل الربيع 21 مارس 2025
ليه أنا عملت التحدى ده
التحدى ده أنا عملته عشان يكون دافع ليا للتغير للأحسن بعد محاولات كتيرة فاشلة بتنتهى بإنتكاسة طويلة وبعدها فترة من الإكتئاب ف المرة دى أنا بحاول أعمل الموضوع بطريقة مختلفة تكون فعالة اكتر وكمان هتكون فى سنة مهمة فى حياتى لأنى حاليا فى تالتة ثانوى
النتائج المرجوة من التحدى
التحدى دا كل الغرض منه هو التغيير للأحسن عن طريق انى اتعلم حاجات جديدة و يكون جزء من بناء شخصيتى و اخلص فيه ما يقرب من 90% من منهج ومقرر تالتة ثانوى وبردو هحاول خلال التحدى دا انى احسن علاقتى بربنا عن طريق انى فى البداية هحاول انتظم فى صلاتى وكمان احاول اضيف ليومى عادات جديدة زى انى ابدأ اقرأ كتب و أحاول أراجع القرأن بعد ما حفظته على صغر و نسيته فى نفس الوقت وخلال الفترة دى محتاج ابطل عادات وحشة انا بعملها زى انى ابطل اسمع أغانى و أقلل على قد ما أقدر الوقت اللى بيضيع على السوشيال ميديا وكمان عادات تانية انامحبش أتكلم عنها
النشر وتوثيق التحدى
خلال فترة التحدى هكتب يوياتى هنا وعلى تويتر (اكس) بعيدا عن مواقع الميديا التانية لأنى بحاول أخد قرار دلوقتى انى أمسح برامج الميديا خلال الفترة دى عشان أقدر انضبط وأنتظم و اوقف إهدار الوقت الكتير اللى بيروح عليهم أثناء مشاهدة المحتوى القصير الغير مجدى
الخاتمة
فى النهاية أسال الله التوفيق و الثبات و اتمنى ليكم يوم سعيد وحياة جميلة
التسميات
تطوير